المراية ... !!

... الحل الوحيد لقعدلها إنها ترقد وتهرب ملي تحس فيه وتنسا الدنيا وما فيها ... عالأقل كي ترقد تحس روحها ماتت, لا عاد لا تحس ولا عاد تخمم والدنيا تولي كيتنها واقفة. لا عاد تتذكر ولا عاد زادة تبكي على سعدها المكبوب. شدت فرشها وعنقت مخدتها وغسلتها بدموعها لين هزها النوم ...

قامت مالنوم .. 3 لحظات بالحساب حست روحها نسات

وكينها بدات من أول وجديت وبعد رجع كل شي كيما كان

"إي كي تبات تخمم وموجوع وترقد باش تنسا ديما كي تقوم تحس روحك كينك نسيت ورتحت وعاودت من جديد .. لكن في الحقيقة لحكايا كلها شوية وقت، ويعاود الشي يهيج عليك والوجاعة ترجع أقوا ملي كانت."

لحاصل .. تذكرتو وتذكرت شصاير فيها من بعدو... سرحت وسرحت وزادت سرحت حياتها واقفا الوقت واقف مخها واقف قلبها يدق .. ولا لا قلبها يوجع .. إي نعم يوجع.. إي يوجع بعد ما إلي حبتو مشا وخلاها.

"في الحقيقة .. لوجيعة لتحس بيها كي يبعد عليك عبد، موش على خاطرو بعد، لكن على خاطر حياتك معادش هوا فيها، وإلي ستانست تعمل فيه وتعيش فيه معادش باش يتعاود، وتخاف ليعيشو مع غيرك، وتحس إنو ماعادش يعوضو حد، وما فماش حد يفهمك ويحبك كيفو، وزيد تتعب باش تعاود ملول. وتتوحش أبسط حاجات كلمة عسلامة تولي مستحق تسمعها"

قامت غسلت وجهها وشربت قهوتها المرة ولقات كتاب فوق الطاولة قديم مطيش عطاتهولها صاحبتها من أيامات لقراية... هزتو وحلتو في الصفحة 23 "نهار 23 هو أول نهار تقابلو فيه" زايد الزهر مڤود مڤود بلعتها بغصة وبدات تقرا.

"راك مرا والمرا قوية وميبكيهاش حتى راجل لمرا حكمت في مخاخ رجال وهيا إلي تبكاهم، موش هوما يبكيووها. وراك قوية .. راك قوية .. راك مرا"

عجبها لكلام غزرت في المراية وقالت كيما نساني حتانا باش ننساه ونعيش حياتي ونحسبو لا عمرو كان ولا تجد، حاجة وفات ومشات على روحها .. "لمشكلة من داخل عارفة روحها تكذب، وذايبة، وقلبها يبكي، وتحب تضحك روحها بالصيف، وتعملهم إلي هيا قوية، وشادة دمعتها بالصيف لا تهبط. " وزايد كلام لكتب يقعد كان في الكتب."

حلت الكاسات وحطت غناية وبدات تتزين لروحها وتميل في راسها وفرحانة بروحها حمرت ومكيجت وعاملة جو على فيروز وهيا تغني وهيا تعمل فالكحل في عيناها فيروز قالت : "أحبه حتى فى الخصام وبعـده عنى يا ناس حرام ما دمت انا بهجره ارتضيت منى على الدنيــا الســـــلام"

والدمعة هبطت تجري من عنيها وشدتها شهقة متع بكا وترخفت وطاحت عالفرش وكالعادة شدت مخدتها وقعدت تبكي على حياتها وعلي مشا وخليها... قلبها تعصر بالوجعاة لين ولات تصيح وتبكي وتضرب في روحها "الزح علاش هكا، شبيني كان آنا صاير فيا هكا، الزح والله نحبو، شبيه مشا، الدنيا تخوف بلاش بيه، شنوا كان باش ينقص مالدنيا كان قعد معايا، عملت كل شي على خاطرو، الزح وجعني برشا. تي نكرهو السخطة .. لا والله لا نحبو الزح مانجمش نكرهو" شبي الناس لكل فرحانين علاه ما نجمش نكون كيفهم، نحب نفرح زادة آنا...

وقفت وغزرت لروحها في المراية "ولقات وجهها مسخ بالكحل" "ولقات وجهها مسخ بالكحل" بدنها خانها وترخف ورجعت ترمات فوق الفرش وبدا يسرق فيها النوم بشوية بشوية لين عيناها تغمضو ...

وهيا هكاكا نوقز التلفون لقات إسموا بلعت غصتها وهزت تجري سمعتو قاللها "توحشتك" طرشقت بالبكا .. قالها "إبجاني توحشت نعنقك"

مازال ما كملش كلامو نڤزت ڤدت مكياجها عملتلو البرفان إلي يحبها عملتلو الحمير لحمر إلي يحبو ولبست الروبة ليحبها والشركة ليحبها والصباط الصغير إلي مايجيش قدها ويوجعها آما إلي يحبو هوا نحات خاتهما الجديد ولبست خاتمها لقديم إلي يحبو هوا وامشاتلو تجري محضرا روحها كالعروسة الجديدة الدنيا كلها ماتنجمش توقفها في اللحظة هذيكا..

وصلت للدار .. تلقا الباب محلول .. دخلتلو تجري للبيت تلقاه قاعد يستنا فيها على كرسي لحيتو هايجا آما محلاها واتاتو الكازي لابس سورية وفلسها الفوقانيين محلولة سدرو ضاهر محلاه ولا هذا الكل آلخاطر آنا بعدت عليه ياخي

قعدت تغزرلو ويغزرلها وقف وهوا أطول منها هزت راسها وغزرتلو في عينيه وقربلها دمعتها هبطت قتلو كيفاش هان عليك تخليني لوقت هذا الكل متوحشتنيش ياخي متوحشتش صوتي لشكون تقول صباح الخير ياخي محبيتش تسإل عليا ولا تشوف شصارلي هنت عليك تخليني وحدي موش آنا إلي كنت ديما معاك وعمري ما خليتك وحدك شعمتلك باش توجعني وهكا تحكي وتبكي فرد وقت وشادتها الشهقة.

قرب وقللها آمان أسكت و"باسها" ذابت بين إيديه نسات لوجاعة الكل طارت فالهوا ماعادش تنجم تاقف على ساقيها قلبها وقف عنقتو، غرست ضوافرها فيه زادت حبتو أكثر من قبل

مسحلها دموعها بإيديه شدها من يدها كالطفلة الصغيرة هزها للفرش رقد وحطلها راسها على سدرو حست براحاة عمرها ما حستها قبل توحشتو وتوحشت راحتو عنقتو لدرجت خايفة ليعاود يهرب عليها كالطفل الصغير حلفت باش ماعادش تسيبو ضحكت مالفرحة وبكات فرد وقت ورقدت بعد شهرين كاملين ماذاقتش فاهم النوم بعد شهريت بكا وسهر جا النهار إلي قلبها رتاح ورقدت بين إيديه

الوقت ما تحسش واتعدات الليلة تقول ساعة وقامت في الصباح فاقت و غزرت لروحها في المراية "لقات وجهها مازال مسخ بالكحل" ...

سي السيد ... !!

كانت مسكية وحدها تبوم

لا عندها لا صاحب ولا خو

تقرا وتروح ... هذيكا حكايتها

دوبها دوب روحها، وراسها مالقعة متهزوش

ومالدار ما تخرجش وما تعرف شي مالدنيا

عويقلا مسيكنة

إمشي يا زمان ويجا يا زمان

صحابها كبرو، وهيا كبرت

خرجو ودارو وحبو وتحبو

وهيا كالعادة شادة دويرتها و

وديما قاعدة تقول "لعلا فيها خير"

نهار مالنهارات

شادة ثنية الدار وقاصدة باب ربي ومروحة ..

تعدا بجنبها، راجل وعليه لكلام

سيد زمانو كيما يقولو

ڤلبها الصغير رق، خدودها حمارو، نسات كيفاش تمشي و حطت يدها على فمها باش تغطي ضحكتها ومشات تجري

حشمت مسكينة

بعد نهارين، نقولو تقريبا مع الساعتين

ماشية تقراكالعادة، عرضها سي السيد

طلع ولد الجيران، وسبحان ربي شخلق فهالإنسان

زين وڤد وعين،

غزرت راجل، وقفت راجل

لحيا لافتلو وجهو، زايدة فيه شطر.

ڤلبها دڤ وزاد دڤ وغزرت وهربت عينيها ...

الشي هذا موش مستانسا بيه ما تعرفوش

أول مرة حست بروحها مرا، وبدنها هاج علاها، وغلبها.

روحت شدت بيتها لا عاد لا تاكل لا تشرب

و لا ترقد زادة

زعمة هذا إلي سمعت صحباتها يحكيو عليه وإلي يقولولو ...

"الحبك"

جميعة لولة تعدات والثانية كيف كيف

وكالعادة شادة ثنيتها ومتذكرا لي نساها في وحدتها

وبالزهر راتو واقف يستنا فيها .. وبدا هوا بالسلام عليها

نفسها تقطع، قلبها وقف

عيناها وحلو في عينيه

وقالت في قلبها

"محلاه من قريب ... أشب وأحلا وأسمح"

مد يدو وسلم عليها

بدنها رعش

"حنتلو يا ديني راهي حنتلو"

قلب لنثة راهو ما تنجمش تشد روحها

حبت تنڤز وتعنقو

وتبكي عندو كان لزم.. دموع أنثى ذايبة قدم ذكر

دموع فرحة وحسرة، دموعة مرا حابة راجل،

غايرة عليه من روحها، تحب تخبيه عندها، تحب تحس روحها أنثى بين إيديه،

تي ما تعرش حتى إسمو ... آما سماتو "سي السيد"

مسكينا حبتو المغبونة

هاذا هوا الحب من أول نظرة

إمشي يا زمان وإيجا يا زمان

عرفها وعرفتو، رتاحلها ورتاحتلو

تبدلت ... ولاّ لا لا هوا إلي بدلها ...

خرجلها لنثا إلي فيها

ولات لاهية بروحها وتتزين، ولا قول تتزين ليهوّا

"سي السيد" لازمو يراها مزيانة ولاهية برويحتها

الشعر عالكتاف مسبول

واللحمر عالشفايش يشع

ولات خاطفة عينين الذكو ة .. بعد ما كنا منسية مغبونة

آما ميهمها في حد بخلاف "سي السيد"

راهي متاعو هوا كهو !!

خرجها، دورها، ورالها الدنيا،

عنقها وعنقتو

باسها وباستو

عيشها في الجنة

حسسها إلي هيا مرا موش لعب

غار علاها، وما حب حد يراها، حبها ليه هوا وحدو.

حكات عليه لأمها وأختها وصحابها وللي تعرفو وللي ما تعرفوش

وتقوللهم راهو يحبني

"سي السيد" يحبني آنا

ولاتش تمشيلو للدار تقومو

"سي السيد" يحب يحل عينيه عليها

رومنسية زعمة زعمة

قال شنوة يحب يحل عينيه على وجها

تي دلال هذا .. آما خلاهم فرحانين ببعضهم !!

نهار من نهارات مشات باش تفيقو

هازتلو وردة حمرة زادة ..

وفطور صباحو .. كينو عروس "سي السيد"

قايللها باش يبات يقرا مع صحابو

قالت خنفرحو بحويجة وانسيه في تعب الليل

دخلتلو للدار

الضحكة من وجها متنحاتش

تستنا في ضحكتو كالعادة

وبوسة الصباح

دخلت تلقاهم زوز فوق الفرش موش واحد ... !!

غزرت

ضحكت، وبكات

ماعرفتش شتعمل

تضحك ولا تتغشش

تعارك ولا تسكت

لي ترا فيه صحيح ولّا غالط

سكتت وبلعت السكسنة بدمها

تذكرت ليامامات والخرجات

والدنيا لتعدات

والضحكات، والهمسات

تي تذكرت كل شي الحاصل ...

هربت لصحبتها تحكيلها

تفرغلها في قلبها

تبكي وتعيط على زهرها لحرف

والدنيا لي غدرتها

كان قعدت بكة وحدها خير مالوجاعة لي تحس فيها

- عيطت وقلتلها راني لقيتهم زوز راهم زوز

-قالتها كلهم كيف الرجال ما فيهمش أمان

وتو تلقا ما خير منو وسيد سيدو كان لزم

وكان علي لقيتها معاهراهي وحدا مسخة غارت منك وحبت تفكهولك

عيطت وضحكتوقالت يا ليت ... يا ليت .. كان جات وحدة إمسخة

في الهم عزا وقتها

آما سي السيد طللع موش سيد !!!

التونسي و التكحيل ... !!

التونسي والتكحيل حاجتين ما تنجمش تفرقهم على بعظهم لوكان شي يصير. هوا كان باش نقولو لولاد كهو يكحلو وقتها نكذبو على رواحنادونك لبنات زادة يكحلو...آما كل واحد والتكنيك متاعو !!

يعني في تونس موش معقول طفلة تتعدا والتونسي ما يغزرلهاش بالطباعة "كل شي حباس كان النظر يا ناس" باهي هايلة هاذي .. آما فما نظر من نظر زادة ...

التونسية كي يرا طفلة يقعد يغزرلها لين يوصلها لدارهم ... ولا عادي تقولش يتعبش هوا ولا يفد .. لا بالعكس يبدا يكشخ وعامل جو. وقداش حنين عاد هوا .. ما يرتاح إلا ما يوصل بنات تونس الكل لديارهم .

باهي إلي مفهمتوش كي تتعدا طفلة ويقلها "محلاك" ولا "محلا شعرك" ولا "محلا مريولك" ويظحكلها .. يعني هوا يستخايل كي يقوللها هكاكا باش ترجعلو تجري وتشدو من ساقو "وتقلو يا يعيشك محلاك وانحبك آنا ... وكان ماجيتش إنت منعرش إلي مريولي باهي منعرش شنوة سصير فيا ... و أمان صوحبني توا توا"

ولا يجبدها من شعرها وهيا تمشي ... ولا يشدها من يدها ... زادة يستخايل باش تقف وتعنقو وتقلو يا مغسي وجعتني وفجعتني قدام الناس وركبتلي بو صفير وحشمتني قدام الناس ...آما بالرغم هذا الكل حبيتك توا ديراكت... وآمان صوحبني وراك سحرتي بصحكتك زادة .. وخلي عاد كي يسبها .. باللهي حتى في التكحيل بهايم ... يا معلم شي تجوبير عذا الكل!!

تي ماو كي عجبتك أغزر وانتي ساكت ... لازم تبهرهم بالأساليب الفاشلة متع التكحيل متاعك!!!

وبالنسبة للبنات ... خلى عاد كي تبدا حاطة الحطة وفرحانة بروحة وتخرج ... تقريبا زڤط للشارع !!! وباز متحب حد يغزرلها بالطباعة ... إلي يراها معناها تتوقع هيا باش يهبط عينيه ويتعدا ولا كيفاه ويحسب روحو ماصار شي ... تقلك ملا تخلف على أساس عايشة مع كمشة حجر لا يراو ولا يحسو هوما !!! وتقلك لغرب متطورين ودرا شنوة ... على أساس كي تتفرج في فيلم أمريكاني وتتعدة طفلة عريانة قدام كمشة ولاد يدورو وجوهم ويقولو "أستغفر الله"

والغرببة إنو بنات تونس مرضة في مخاخهم ... باهي كي يجيها طفل عالفايسبوك ويكلمها تحڤرو ... يكلمها في الشارع تطفيه ...يطلبها في التلفون تعلق عليه !! وبعد تقلك الزح فديت عندي برشا سليباتار ومالقيتش حتا طفل .. يا زحي تحبو يجيها فالمنام ولا كيفاه !!! باهي هاذي الحاجة لولة.

والحاجة الثانية .. إنو طفلة كي يعجبها طفل وتبدا حاطة عينيها عليه ... و عادي توصل زادة تحبو وتموت عليه وكل يوم تهبط فيهم حيار عليه .. آما تلعبهم دور التزعبين والعسول والريق البارد !! يكلمها إتلفو، يحكي معاها تحقرو، ودور الحڤرة إلي تلعبو كالعادة...

يا زحي شتحبو يعمل يشدك بسلسة بالصيف ولا كيفاه !!! ولا تقلك لا ما نحكيش معاه آنا لازمو يجي هوا يحكي معايا قبل !! يا زحي شنيا هالتزعبين هذا تي ماو عجبك قلو راك عجبني ساهلة علخر لحكاية لواه الريق لبارد والتزعبين !!

ملخر شعب ينافق على بعظو وكلها تكذب على بعظها وجايبينها كلاس وريق وهوا كي تجي تحل السرة تلقا خيط ... هذا كان لقيتو أصلا الخيط.

نهار السبت ... !!!

كي كنا صغار كنا نستناو في نهار السبت هذا إلي توفا فيه القراية .. كنا نكملو نعديو آخر حاجة، وقتها كانت "تعبير كتابي" ... و بعد ما تكمل تعدي ... تروح تجري للدار، لا تتلفت لا على ليمين ولا على ليسار. تجري وقريب تسبق الريح لا توقفك لا كرهبة ولا عباد... توصل تبدل حوايجك، والوالدة تعطيك حوايج الصيف وتبدا فرحان و في تحس روحك خفيف وطاير والضحكة من وجهك ما تتنحاش.. تبدا تنڤز شايخ ... نحيت غمة من على قلبك إلي هيا لقراية .. زعمة زعمة غمة!! "وقتها كان لواحد موش عارف شيستنا فيه في هالدنيا"

لحاصل وقتها كلنا كنا قرايين.. وننجحو وجونا علمي .. ولا سمعنا يها هاذي حكاية الكونترول ولا واحد يدوبل كل عام بعامو تقرا ولا ماتقراش في آخر العام تلقا روحك ناجح.

لحاصل بعد متبدل حوايجك وتظربها ساعة تكشخ تتذكر إلي إنت كملت لقراية ... وباش تلعب بال "بلاي ستشن" كهو بعد ماقريت توا باش تتفرهد

لا تخمم لا في خروجات ولا قهاوية ولا تشري ولا شي .. تركش في الدار وتلعب خير من الدنيا وما فيها ... كهو عاد الصغر هذاكا

" تمشي تجري لأمك وتقولها يا "ما" هبطلي "بلاي ستشن

على أساس هوا فوق لڤلص ومتخلطش تهبطو وحدك ... محلاه الصغر وبرا !!

وبعد تبدا تركب فيه وعينيك تشعل مالفرحة وكل ما تبدا تلعب تقول لواحد تسحر ولا شصارلو... لا عاد لا يخمم لا في ماكلة ولا نوم من قدام التلفزة ما يتحركش. ومشاكلو وهمو في الدنيا هوما كيفاش يمنع الأميرة في "سوبر ماريو" ولا كيفاش يقتل التنين..

تلقاه ڤاتل روحو وعاطي ما عندو باش يسكر اللعبة ويكملها ويخرج يحكي لولاد الحومة ..

وخلي عاد كي يقولولك الدار باش تمشي غدوة للبحر .. من قبل بنهار تبدا تحظر في روحك تقول خارج تصهر موش لعب تحظر اللعب و الشورط "وقتها كلسون" إلي باش تعوم بيه وليل كامل ما ترقدش وانتي فرحان وتقوم من غدوة بكري وأول واحد وتقوم الدار لكل ... وفي الثنيث تنحي مريولك من قبل ما توصل حتى للبحر كان لزم مالدار تمشي عريان وهذا الكل وانتي زاهيتلك وصانع جوك وباعث لعالم...

إمشي يا زمان وإيجا يا زمان وجا نفس نهار السبت ... أما معادش عندو نفس المطعم ... كلشي تبدل توا ...

تكمل قرايتك في بالك باش ترتاح، تلقا 1000 مصيبة أخرى تستنا فيك هاو كونترول هاو مستقبل هاو دار هاو شارع ...

لواحد كان ولا على بالو بالدنيا بايعها بلفتا عايش زمانو يخمم يلعب ويرقد وياكل وديما فرحان و عامل جو

"زح توحشتو نهار السبت"

ملحد PART 2 ... !!

في تونس مالصغرة يصورولك إنو الدين يخوف وربي يحرق بالنار ويرميك في جهنم وتتحرق ولاش تبك وتعيط ويصير فيك ما يصير لحاصل تولي ترا فالدنيا كحلة قدامك، يسودولك دنيتك عالدخلة ... واعمرهم لقالو

 حاجة باهيا ولا فرحوكة بالعكس ديما الخايب، كهو التونسي ديما مقلوب.

كي كبرنا قعد فينا كالخوف والرعب مالنار وجهنم لدرجت إنو لعباد وصلت تخاف حتى إنها تحكي في الدين ...ولا كي تحب تسإل سؤال ولا عندك إستفسار يا تبدا خايفك لا يسمعك حد وارصيلك تدفن الكازي لداخل وتموت معاه !!

إمشي يا زمان ويجا يا زما .. كبرنا واتكربسنا وكل واحد خذا مالدنيا على قد جهيدو .. إلي حدو الفاتحة وإلي حدو جزء عامّ وإلي وصل بيه التلويج لمغاغر وادغاغر !!!

فما عباد عندهم بزايد حب إطلاع .. يحب يعرف كل حاجة كيفاه ووقتاه وعلاه جات ...

آما في هالبلاد لحكاياة هاذي متوكلش الحبز ويمشي لواحد في كلامات لعباد ويولي بيه واعليه !!

لحاصل، تبعشي لواحد حب لإطلاع متاعو ويشوف ماه وين يصب..

ومن حاجة لحاجة يقرا ويتبع حب يشوف شفما ديانات فالدنيا... !!

إي شبيه .. حاجة باهية باش لواحد يقرا ويتثقف ويعرف الدنيا شفيها ومافيهاش جاب ربي أول كلمة هبطت هيا "اقرأ" !!

ومن جرت البلاد الحرفة ولاش لواحد كي يحب يقرا حاجة هكة ولا هكة في بلاصة معبية يبدا يخبي في الكتاب على عينين لعباد..

لمشكلة كي يراك تونسي تقرا في كتاب عالمسيحية وإلى ليهودية ما يجيش يسإلك ولا يستفسرك ويقلك فاش تقرا ولا علاه تي لا هولدي طول يتشوحرلك وفي مخو باز إنتي كافر إيهودي ومرتد .. تي تقراها في عينيه موش لعب !!!

رصاتلوشي الواحد ولا يقرا بالسرقة، ويتعلم بالسرقة وكي تسإل واحد سؤال على دين آخر ولا حاجة يتڤلب ووجهو يحمار ويزراق ويخضار في بلاصتو ويبدا يستغفر تقول شعمتلو وهوا تلقاه قبلها بنهار بالعو ڤتطرة !!

موش مشكل لكتب تتقرا في الدار ولقينالها حل وتوا وقت التكنولوجيا والفايسبوك والدنيا !!

توا الناس لكل تفركس وتشوف وتبعول وكل واهد مخو وين هزو آما تحت حس مس باش لعباد متعرش ومتشوفش وميقولوش عليه الكلامات ..

ولاش لواحد يحط جام على باج ويبدا خايف تحط جام على باج مسيحية بالوقت تولي مسيحي تغلط تحط حاجة بالوقت تولي منهم وإليهم ياولدي كلعادا نفس الكلمتين "كافر وملحد" ديراكت يدمغوك بيهم..

شي ... هالخوف لي عايشين فيه مالعباد وين ماشي ... ياخي ربي باش يحاسب ولا لعباد ؟؟

لعباد حلو الحرام وحرمو الحلال ولاش لواحد عايش على هوا لعباد ويعمل إلي يحبو هوما

موش عيب راهو ناس تقرا وتفركس .. آما إلي عيب إلي يجي يلعبلك فيها الإمام صحنون وهوا الفاتحة موش حافظها وكي يتغشش يهبط ربي حشيش

وكي تقلو شو الغرب وين وصل .. أول حجة يقولك هذوكم ناس قارية وصلو يعرفو دينا وأكثر منا زادة ... آما كي إنت تفرك في دينهم تولي كافر وميقولوش عليك قاعد تتثقف.

والسلام

كلهم كيف كيف ... !! PART 3

... هاو نوقز التلفون ... ڤلبي دق، نڤز، بدني رعش، دخلت بعضي، إسمها فالتلفون.. زعم إتذكرتني ؟؟ توحشتني ؟؟ حبت تسإل عليا ؟؟ هزيت التلفون .. سمعتها تتنفس .. قلبي حسيتو باش يخرج من بلاصتو .. شديت روحي .. ونزلتي على ساقي بيديا وغمضت عينيا وقلت .. ألو .......... !! سمعتها تتنفس .. إي والله هيا، باهيشي توا ما نعرش نفسها ياخي آنا !! قعدت ساكتا 3 ولا 4 ثواني بالحساب، حسيت الدنيا وقفت وطوالت وتخيلت 1000 حاجة وحاجة، زعمة باش تقلي كلام يرتحني ولا يقتلني؟؟ باش تقلي توحشتك ولا كرهتك؟؟ تعبت وانا نستنا معادش النجم الدنيا ضياقت بيا وقلبي عصر عليا .. عاودت قلت ألو ... !! قتلي ألو.. ضو في بدني ضرب، قلبي دق كينو كان واقف عندو سنين، صوتها محلاه، بنين في وذني، صوتها شعل فيا نار، لهبني من داخل، عاود فيق فيل حكايات قديمة .. وفي داخلي 1000 صوت قاعد يعيط ويقوللها: "آمان تكلم قول أي حاجة، طفيلي ناري، بردلي على قلبي، قلي توحشتك حتى بالكذب ميسالش والله نجيك نجري لوكان في آخر الدنيا، بركا باش نشوفك كهو ونروح .. توحشت ريحتك، وبدنك وتعنيقتك، توحشت غزرتك، وتبسيمتك، تصدق توحشت غشك، ميسالك ما تمشيش وتغشش عليا قد متحب لموفيد ما تخلينيش واقعد بجنبي ... شباها ساكتة !! زعمة كهو باش تبعد؟؟ باش تخليني و باش تمشي لغيري؟؟ باش تحب عبد آخر؟؟ إلي يوجع موش إنها باش تبعد.. إلي يوجع ويقتل إنها باش تقلو نفس الكلام إلي كان تقولهولي لغيري !! باش تكلمو و تسإل عليه، باش تكلمو وتسمع صوتو في كل صباح وقبل ما يرقد، باش تولي تضحكلو وتشكيلو وتبكيلو، تحكيلو عاللبسة لتحبها، على الغناية لتذتكرو باها، وعلى صاحبتها لي غارت منها، باش تاقف قدام لمرايا سوايع على خاطرو وتتزين وتمكيج وتلبس وهذا الكل باش تراه، باش تولي تشاورو هوا قبل ما تخرج موش آنا، تتفجع عليه هوا كي يبطا موش آنا، تفرحو هوا موش آنا. زعمة باش تقلو نحبك ؟؟؟ ولا قالتها ؟؟ وكي نراها معاه في الشارع شنعمل نسلم ولا نتعدا كينو لاكان ولا صار ؟؟ كان نلقا نفكها من إيديه ونقلها توحشتك ونعنقها ومعادش نسيبها ؟؟

يعني معادش متاعي ؟؟ معادش نغير عليك ؟؟ ماعادش نخاف عليك ؟؟ ماعادش نسإل عليك ؟؟

علاه هكا .. نحس حاجة لداخل توجع .. حاجة تنزل على قلبي.. زعمة موجوعة كيفي ولا تخمم فيه وصايا نساتني وتعداتني ؟ لغنايات لكل يذكروني باها، لقهاوي و الشوارع، تي حتى بيتي، وجهي في المراية يذكرني بيها؟؟ لبنات لكل فالشارع وليت نغزرلهم هيا، الشعر الكل نحسو تقال على خاطرها .. منجمش ... منجمش ... منجمش نعيش بلاش بيها .. لا هيا متاعي آنا كهو .. ما ياخذها حد مني !! موش قتلي قبل راني ليك... أمان متخلينيش وحدي !!

منيش خايب راني .. والله ماني خايب باش يصير فيا هذا الكل !! كيفاش باش نقوم الصباح ومغير متكون أول حاجة في بالي ؟؟ لشكون باش نجري نفرحو معايا ؟؟ لشكون باش نجري نفرغلو قلبي ؟؟ لشكون باش نمشيلو ونرتاحلو ونحكيلو نهاري ؟؟ آآآآه باش تهزو للبلايص إلي مشينالهم ؟؟ باش تحكيلو حكاياتنا ؟؟ آمان جاوب قول حاجة *** التلفون رزن من يدي .. نتما نسمع كلمة .. مانيش عارف يا موجوعة .. يا سارحة .. يا تبكي .. يا تخمم ؟؟ ستخايلتها قدامي .. كان نراها .. نسامحها، إي والله نسماحها، لفايدة هاي بجمبي، ميسالش تو الوقت يصلح، محسوب هكا ولا هكا موجوع آنا، آما موجوع وهيا بجنبي خير ..

زعمة نتكلم ونقلها توحشتك، تمشيش تتغشش عليا، تمشيش تعلق .. لا لا زعما تقلي حتانا توحشتك .. "كي خممت فيها لكلمة بركا فرحت" !!

ميسالش نعرفها تحبني متخلينيش ونقوللها راني توحشتك ومسامحك، غير أرجع بركا، وكان تحب تو نجيك توة ... ثنية داركم حافضها أكثر من دارنا.. ياما مشينا فبها ولعبنا وفدلكنا فيها.. تتذكر وقتلي إنتي تجري وانا خالط عليك وشديتك وعنقتني وقتلي نحبك ؟؟؟ كان تحب نجيك ونهزك للقهوة إلي تحبها ونخلص آنا كان لزم لفايدة تكون فرحانا... ونرا الضحكة في وجهك.. كان تحب ماتتكلمش، نراك كهو .. تعوضلي على كل دمعة هبطت .. !!

كهو باش نقوللها هذا الكل وقلبي قايلي خير وقلبي عمرو ما خلاها بيا ..

قلتلها إسمع راني توحشتك وماذبيا لوكان نراك و ...

"علقت التلفون ..."

قعدت شاد التلفون درج في وذني .. بدني وحل.. مقعد كان لهوا داخل خارج.. عرقت بكلي.. بدني سخن.. موخي تحرق.. قلبي ذاب ..!! وتعلقت معاها حياتي.

قلبي يوجع فيا والدمعة هبطت من عينيا والدنيا دارت بيا وعمري ماني باش ننسا هالبنية.

 "هذه القصة من محض خيالي
"نذير".

التونسي وعلاقتو بالماسونية ...

بما إنو الشعب التونسي نهار كامل راڤد وليل كامل ساهر كالخفافش، لازم تجيه كالنزعة متع "اليوتوب"، ويبدا يتفرج في حكايات 
مالحيط والڤلڤ يهز فيه ويصبط.

لا علينا.. الحاصل كيما التوانسة الكل لازم يسمعو بالماسونية ومشتقاتها ..

إذا التونسي في وقتها أول حاجة يعملها يمشي يجري كالمدك للڤوڤل ولا يوتوب ويكتب "الماسونية".

بما إنو مدك هوا في راسو .. إذا باش يبدا يصدق أي حاجة يراها وبعد 4 فديوات تفرج فاهم و 3 مقالات قراهم و هوما كاتبهم واحد سكران،
باش يبدا يحس روحو العالم والمثقف وكاشف أسرار الكون.

لحاصل باش يحس روحو عم الطيب ملخر،
ومن غدوا باش يلعبهم دور المحلل والفيلسوف والمثقف والمؤرخ ويولي أي عين وأي مثلث "ديراكت = ماسونية"

وخلي عاد كان في كليب ولا فيلم واحد حك عينو ولا دخلتلو تفشة تي ماو مسكين حياتو تدمرت و ولا ماسوني وحلبلو وهذا باش يحكم العالم وكاللوغة لمڤملة.
وأي فنان حلت معاه وولا مشهور، طول مغير نيقاش "الماسونية عاونوه"

يا بوڤلب شي هالبهامة في هالشعب وهوما يڤودو فاهم كالبڤر إلي يراووه يصدقوه طول. 
ماعندهم عقل يخمو بيه الزح ؟؟

توا بجاه ربي واحد تلقاه مازال ياخو في مصروفو مالدار وعامل تصويرة زعمة زعمة "ماسوني".. لا والغريبة الناس لكل تصدقو.

باللهي شينبو بيه هذا، زعمة باش يعاونهم على إحتلال العالم.

ناس تعدي حياتها كامل تفركس وتقرا والتونسي يخسر سويعة إنترنات ويولي "كونان" موش لعب.

باللهي سؤال للتوانسة كي هيا منظمة سرية كيفاش عرفتوها ؟؟