يا سيدك بن سيدك قالك كان فما واحد يناديولو "عمك علي".
كان كبير الحومة، راجل مڤدي بكلمتو في الدار وفي الشارع وقدرو عالي وزيد عندو الريشة
فخار بكري إلي يقلك.
لحاصل، عمك علي هذا مشكلتو في هالدنيا حاجتين، ما ينجم يبطلهم ولا ينحيهم "الشراب والنساء".
على قد ما كلمتو أمو في صغرو وبوه في كبرو
وهوا شي لا بطل ولا سيب راسو كاسح مايعمل كان إلي في مخو.
كبر بيه العمر وهوا شادد في "الشراب والنساء" ولا حب يسيبهم تقول صرتو مقصوصة في ڤونة.
لاموه صحابو، قراووه، وراووه، نصحوه وهوا شي
كي بول الجمل التالي ليس القدام.
تلمو لكبارات قالو خنعرسولو لعلا يريضش شويا وتجيه بنت لحلال وتلمو.
وسي علي عاد على شكون يرضا عاد، ڤد وزين وشلاغم تكتف بهيم وراجل وسيد الرجال إلي يقلك.
آما ميسالش ربي تو يهديه هذا شقعدت تقول أمو كل ما تمشي تخطبلو.
وإلي فيه تو يتصلح وربي يغفر ويسامح.
إمشي يا زمان ويجا يا زمان عمك علي شد الريڤلة ومرتو جابتو لالسراط المستقيم.
ولا عمك علي مالدار للخدمة و للقهوة، وسعات يقعد شوية بحذا صاحبو عادل.
بعد مديدة ولا عمك علي يروح تاعب تقلو مرتو وينك يا راجل لا حس ولا خبر نهار كامل تخرج في عقابات الليالي وتروح كان عالفجاري تطايح.
رجعنا لمعبوكة قبل ؟
ماكش ناوي تشعف والتوب
وموش قلت بطلت ؟
كالعادة يقوللها خاطيني كنت بحذا صاحبي عادل وصحابو شدو فيا صحيح.
مسكينة لمرا تجري تشكي لمها وتفرغلها ڤلبها، وبعد تدور وتجاوبها تي تو يتصلح مالو إلا راجل.
ويا فرحة ما تمت لمرا فرحت تخسايل راجلها رزن وعقال وشد الريڤلة آما إلي فيه طبة ما تتخبا.
بعد عويمين ربي حبو ورزقو بطفلة كالنوارة
حبها وعشقها، وملي تولدت وفي فمها مغرفة ذهب
مدللها ما مخليها ناقصة شي آما عمك علي كاسح شيوة في التربية ويحب بنتو راسها مالقعة متهزوش لا خرجات ولا دخلات وكل شي بالوقت،
كهو كل شي إلا شرفو، آما نسا شكان يعمل في شرف الناس.
طلعتشي الطفلة عاقلة و راسها مالقعة متهزوش
فرح وتهنا عاد وقال ربي حبني ومطاحش فيا وانشالله ربي يتوب عليا ونعقال.
هالبنية هزت راس بوها وأمها وناجحة في قرايتها زادة وموش كيما بوها الشيب والعيب.
آما ميسالش تو رب يتوب عليه مالو إلا راجل.
مشات الدنيا مع عمك علي وولا خدمة ودار وسعات مع صحابو وولا يشرب من جمعة لجمعة،
قال شنوة بنتو بدات تكبر وموش باهي يروح سكران كل ليلة آما في آخر الجمعة ميسالش.
نهار مشا يفطر في دار واحد من صاحبو،
والراجل راكش فرحان وعامل لون كيف ملي كانت ڤعداتو شراب وفساد ولا يتعشا في وسط عايلة محترمة.
صاحبو هذا مكسبو طفل وبنية.
غزرلهم وقال في قلبو ماصاب ربي يكتبلي ونجيب وليد ويبدا راجل واقف بحذا أختو وميخليهاش وحدها ويحميها ويصونها.
إمشي يا زمان وإيجا يا زمان، في آخر الجمعة كالعادة تعدا عمك علي بحذا صاحبو عادل وقال نرتح روحي من تعب الجمعة ونعمر مخي شوية.
وهوما هكاكة ڤاعدين
دق الباب .. نڤز سي عادل يجري .. ورجع بين إيديه طفلة ترنكوشة تهز لعقل هزان.
هيا تقرب وسي علي يثبت هيا تقرب وهوا يزيد يثبت "زايد الشيب والعيب" وإلي مافيه طبة ما تتخبا.
هيا قربت وهوا شد راصو وغمض عينيه.
بنت صاحبو داخلة تتمخطر، الشفايف محمرة واللوبان يطقطة والسرة العربانة.
نڤز وخطفها من يد عادل .. لا عرف لا يضربها ولا يدزها ولا يصيح ولا يسكت.
هبل دخل بعظو.
عيط .. وقال شتعمل هوني بوك ناس ملاح وراجل باهي وعايلتكم تبركالله عليها شمجيبك للبلايص هاذم ؟
هبطت عينيها وسكتت ..
كيفاش بوك خلاك تخرج توا في عقابات الليالي ؟
بقات ساكتت ..
عيط وقالها تكلمي حلي فمك ڤولي حاجة.
قاتلو راني قتلو "ماشية للحجامة" !!
هبل عمك علي ودخل في حيط.
خلاهم هكاكا وخرج ..
روح هايم في الشارع يكركر في ساقيه وتكركي
وألف سؤال يدور في راسو.
شبي الدنيا هكا غدارة ؟؟
لبارح الطفلة في دار بوها بين عايلتها وتوا شو ويني في عقابات اليالي.
دخل لدارو لقا مرتو تظحك وشاريا الڤازوزة ومطسبا لحلو.
قالها شبيكي يا مرا هبلتي شتعملي في عقاب الليل ؟
قتلو بنتك نجحة.
فرح وقالها باهي منجمتيش تصبري لغدوة، عاملة الحالة هاذي في عقابات الليالي ؟
قتلو خليني نفرح يا رجل، بنتي نجحت وهزتلك راسك.
هز عينه لسماء وحمد ربي عالنعمة لعطاهالو موش كيما غيرو فاش يعاني.
دارلها وقالها باهي عيطيلي لبنتك خنباركلها
غزرتلو وقتلو
بنتك مشات للحجامة ....
