لحكاية بدات ... بشحطة على ترمتي، وما نتذكر شي كان وأنا قاعد نبكي
وقتها الناس لكل كانت تضحك كان آنا نبكي وانوح ونرا في الدنيا بالمقلوب وراجل شدني يدلدل فيا من ساقي
ملا عالم جيتلو، هكا يستقبلو لعباد !!
حد ماهو حس بيا ولا غزرلي
لكلها فرحانين ويزغرطو كان آنا العريان إلي في وسطهم
لمهم بداية ما هيش ولا بد
لحاصل هكا كان أول ليقاء مع الدنيا !!!
من أولها وآنا نجري ونجري قال شنوة نقرا باش نفرح ..
نعدي عام كامل نقرا وساهر الليالي ومتڤطع لا نوم ولا تفرهيد وآنا راسي مكبوب في الكراسة
وبعد كي ننجح نفرح نص ساعة بالحساب وتوفا غادي ..
كل عام نفس الحكاية
كبرت و شفت الدنيا ولقيت إنو الفرحة تتقاس بالدقايق والهم والحزن يتقاس بالعوام والسنين وسعات يعيش معاك لين تموت ..
لا علينا الحاصل مالصغرة قالولي دارنا أقرا
قلتلهم علاش
قالولي باش تنجح
قلتلهم علاه
قالولي باش تخدم خدمة باهية
قلتلهم علاه
قالولي باش تخلص بالڤدا
قلتلهم علاه
قالولي باش تنجم تعمل على روحك
قلتلهم علاه
قالولي باش تنجم تعرس
قلتلهم علاه
قالولي باش تجيب صغار !!
باهي يعني نعمل هذا الكل ونتعب هذا الكل للصغار إلي ما زلت ملقيتش أمهم حتى ؟؟؟ وشكون قال إلي نحب نعرس ؟؟؟ شكون قال إلي نحب نجيب صغار ؟؟؟ علاه ما ماسألونيش ؟؟؟ باهي وآنا وين فالحكاية !!!!!!
يعني أصلا مانيش هارب منها .. نفس المعبوكة .. نتعب حياتي كاملة باش نفرح في درج متع نهار إلي باش نولي فيه بو !!! وزين نتعب باش هوما يرتاحو
يعني كل واحد يخدم باش يفرح إلي جاي فالثنية
زعمة أول عبد جا للعالم شكون فرحو ولا خدم على خاطرو ؟؟؟
وآخر عبد زعمة باش يعيش باش يفرح روحو ؟؟؟
غباء
وفاللخر كي جيت نحلل فيها نلقا إنو آنا نحاول ننجح باش نفرح
نشري حاجة جديدة باش نفرح
نخرج باش نفرح
نرتاح باش نفرح
نتفرج في فيلم باش نفرح
يعني آنا أصلا مانيش فرحان آما نحاول نفرح
وديما تكون محاولة فاشلة
زعمة هذاكا علاه ديما لعباد وجوهها مقلوبة ومتغشة من عند ربي !!
يعني "الإنسان تعيس بطبعه"
يعني جيت للدنيا هاذي باش نكون تعيس ومهمتي باش نحاول نفرح لبعض الدقائق وبعد نرجع تعيس لين تجي حاجة تفرحني دقيقتين ولا تلاثة وديما ماشية ونفس لحكاية تتعاود !!
علاه موش بالعكس نكونو ديما فرحانين وعاملين جو وكي تصير مشكلة نتقلقو شوية وبعد نرجعو فرحانين كاينو ما صار شي !!
في وقتنا الحالي ولينا نحاولو نشريو السعادة بالفلوس
يعني لواحد يخمم في خدمة باهية باش يخلص برشة باش ينجم يفرح برشة
وبالطبيعة هذاكا علاه الزوالي ديما تعيس !!!
وبالنسبة لللكذبة متع "السعادة ما تجيش بالفلوس" لوغة زايدة هذيكا
ويزيدو يجيبو واحد زوالي يضحك
تي عادي راهي هذيكا اللحظة عدّا قبلها عشرة سنين وهوا يبكي وينوح على همو والنهار إلي ضحك فيه بالزهر بحذاه واحد شاد مصورة.
لحاصل ...
العبد ولا كي يحب يفرح أكثر .. ولا لازمو يخدم أكثر .. يعني حياتو توفا .. لاعاد لا يعيش لا شي .. نهار كامل مصبوب فالخدمة ..
ولا مجبور باش يخدم مالصباح لليل باش يحاول يدخل فلوس أكثر إلي باش تكون هيا سبب فرحتو
يعني يبدل وقتو بفلوس
يخدم عام باش يشري كرهبة
ولا يخدم شهر باش يشري تلفون
ولا يخدم جمعة باش يشري حوايح
ولا يخدم نهار باش يخرج يعمل قهوة
يعني يبدل أيامات من عمرو باش يشري حاجات تفرحو
يعني عبارة يعطي نهار من عمرو لعرفو باش عرفو يبدلهولو فلوس باش ينجم يشرب بيه قهوة ...
يعني لفلوس هيا أياما من عمرنا
كي تدخل تشري وكي تخلص راك تخلص آيامات وسوايع من عمرك باش يعوضهملك بمريول تلبسو شهر وتلوحو ... !!
شنوة تفرق العيشة هاذي عالعبودية ؟؟؟
وبعد يقولولك نحن في عهد الحرية يخدم عام باش يشري تلفوة وحاسوب ويحكي باهم عالحرية
وإنو إنسان حر.
ويني الحرية كي تبيع ساعتين من عمرك باش تنجم تشرب باهم قهوة ؟؟؟
خلي عاد الوالدي إلي يبيعو عمارهم باش ينجمو يراو ولادهم يضحكو.
طز في العالم أجمع ... !!
