ولينا نعيشو في وقت إلي كل شي فيه ولا تتبيع ولموضة وبصورة أوضح "ريق"
يعني تلقا عبد يعمل في حاجة هوا أصلا موش فاهم لا راسها لا ساسها
وأصلا هوا موش حاملها
آما باش يتبع التيار والموضة والتقليد الأعمى إلي عايشين فيه بقية القطيع
يولي يعمل كيفهم ويحس روحو فرحان
الدليل كي تمشي فالشارع تلقا الناس الكل كيف كيف كالبنات وكاللولاد
وإلي عامل جو لروحو و "مختلف" تلقا الناس لكل تغزرلو
--> الإختلاف نعمة
قبل كان الفن يعبر على الشخص إلي يقوم بيه ولا على مجموعة تتشارك نفس المبادئ و القيم ويعديوها بيناته بما كل ماهو داخل في منظومة الفن من :
"لبسة/ غناء / شطيح/ كتب/ كلام/ أفلام ... والليسة طويلة
لكن .... للأسف توا حتى الفن ولا سلعة تتشرا وتتباع
لا عاد عندها لا راس لا ساس
حتى وصل في دولتنا الحبيبة تونس إنو :
- الغناء لموضة : أي موزيكة باهية تتاخذ ويولي فوقها شعر وتولي لعباد الكل يسمعو فيها ويحبوها وهوا عادة أيامات لتالي يسب فالموزيكة هذيكا
- مراول pink floyd : شعب تونس فجأة ولا يسمعو هالڤروب ويحبو وفيه لعسل وهوا كان تجي تشوف راهم سامعين غنايتين والثالثة تطلع متع ڤروب آخر أصلا
- اللحية : كرهتونا في ولديها اللحية 3 سنين لتالي كانت دليل على واحد موش لاهي بروحو و توا العشق ولا فاللحية والغريبة تلقا طفل حاط جام على باج "جمال الرجل في اللحية" تي شي بالحرام ينطق
-التصاور إلي درا كيفاه : كهو توا عاد كلهم فنانين ويعرفو يصور "الفضل بالطبيعة يرجل للأنستڤرام" أي تصويرة يخرجها مزيانة حطا تصويرة ساق ... هوا مان تجي تشوف فما شكون مصورين ساقاهم ...
- الكتب : ولات لموضة، يا ديني القراية ولات لموضة زادة "آنا شخصيا نعرف شكون ملي عرفتو توا تقريبا عامين ولا أكثر وهوا نفس الكتاب في كرتابتو" ضاهرلي يحفض فيه ..
- قلة النوم بصورة أوضح insomnia : ولاتش لعباد تتعارك كل واحد قداش عندو مرقدش وعادي راهو شطرهم يهبطو ستاتي ويمشيو يرقد طول
يعني في هالمجتمع الأغلبية إلي فيه عايشة بطريقة copier / coller كلي ميهمهمش تواتاهم الحاجة ولا، يراووها على غيرهم باهيا، كهو لازم يعملوها، مينجموش يعملو حاجة من مخهم، ولا حاجة يحسوها، كهو تونس كاملة تلبس نفس اللبسة وتسمع نفس الغناء وحاجات زادة أخرا كيف كيف
وهانا بانتضار اللموضة الجديدة الجاية عاد شنوة باش تولي وشنوة باش الغرب يطلع وتونس وقتاش يقلدوه .
معلومة : "الشاذ يحفظ ولا يقاس عليه و الكلام للأغلبية آما موش للناس الكل بالطبيعة والمجراب تهمزو مرافقو"
