ملحد PART 2 ... !!

في تونس مالصغرة يصورولك إنو الدين يخوف وربي يحرق بالنار ويرميك في جهنم وتتحرق ولاش تبك وتعيط ويصير فيك ما يصير لحاصل تولي ترا فالدنيا كحلة قدامك، يسودولك دنيتك عالدخلة ... واعمرهم لقالو

 حاجة باهيا ولا فرحوكة بالعكس ديما الخايب، كهو التونسي ديما مقلوب.

كي كبرنا قعد فينا كالخوف والرعب مالنار وجهنم لدرجت إنو لعباد وصلت تخاف حتى إنها تحكي في الدين ...ولا كي تحب تسإل سؤال ولا عندك إستفسار يا تبدا خايفك لا يسمعك حد وارصيلك تدفن الكازي لداخل وتموت معاه !!

إمشي يا زمان ويجا يا زما .. كبرنا واتكربسنا وكل واحد خذا مالدنيا على قد جهيدو .. إلي حدو الفاتحة وإلي حدو جزء عامّ وإلي وصل بيه التلويج لمغاغر وادغاغر !!!

فما عباد عندهم بزايد حب إطلاع .. يحب يعرف كل حاجة كيفاه ووقتاه وعلاه جات ...

آما في هالبلاد لحكاياة هاذي متوكلش الحبز ويمشي لواحد في كلامات لعباد ويولي بيه واعليه !!

لحاصل، تبعشي لواحد حب لإطلاع متاعو ويشوف ماه وين يصب..

ومن حاجة لحاجة يقرا ويتبع حب يشوف شفما ديانات فالدنيا... !!

إي شبيه .. حاجة باهية باش لواحد يقرا ويتثقف ويعرف الدنيا شفيها ومافيهاش جاب ربي أول كلمة هبطت هيا "اقرأ" !!

ومن جرت البلاد الحرفة ولاش لواحد كي يحب يقرا حاجة هكة ولا هكة في بلاصة معبية يبدا يخبي في الكتاب على عينين لعباد..

لمشكلة كي يراك تونسي تقرا في كتاب عالمسيحية وإلى ليهودية ما يجيش يسإلك ولا يستفسرك ويقلك فاش تقرا ولا علاه تي لا هولدي طول يتشوحرلك وفي مخو باز إنتي كافر إيهودي ومرتد .. تي تقراها في عينيه موش لعب !!!

رصاتلوشي الواحد ولا يقرا بالسرقة، ويتعلم بالسرقة وكي تسإل واحد سؤال على دين آخر ولا حاجة يتڤلب ووجهو يحمار ويزراق ويخضار في بلاصتو ويبدا يستغفر تقول شعمتلو وهوا تلقاه قبلها بنهار بالعو ڤتطرة !!

موش مشكل لكتب تتقرا في الدار ولقينالها حل وتوا وقت التكنولوجيا والفايسبوك والدنيا !!

توا الناس لكل تفركس وتشوف وتبعول وكل واهد مخو وين هزو آما تحت حس مس باش لعباد متعرش ومتشوفش وميقولوش عليه الكلامات ..

ولاش لواحد يحط جام على باج ويبدا خايف تحط جام على باج مسيحية بالوقت تولي مسيحي تغلط تحط حاجة بالوقت تولي منهم وإليهم ياولدي كلعادا نفس الكلمتين "كافر وملحد" ديراكت يدمغوك بيهم..

شي ... هالخوف لي عايشين فيه مالعباد وين ماشي ... ياخي ربي باش يحاسب ولا لعباد ؟؟

لعباد حلو الحرام وحرمو الحلال ولاش لواحد عايش على هوا لعباد ويعمل إلي يحبو هوما

موش عيب راهو ناس تقرا وتفركس .. آما إلي عيب إلي يجي يلعبلك فيها الإمام صحنون وهوا الفاتحة موش حافظها وكي يتغشش يهبط ربي حشيش

وكي تقلو شو الغرب وين وصل .. أول حجة يقولك هذوكم ناس قارية وصلو يعرفو دينا وأكثر منا زادة ... آما كي إنت تفرك في دينهم تولي كافر وميقولوش عليك قاعد تتثقف.

والسلام

كلهم كيف كيف ... !! PART 3

... هاو نوقز التلفون ... ڤلبي دق، نڤز، بدني رعش، دخلت بعضي، إسمها فالتلفون.. زعم إتذكرتني ؟؟ توحشتني ؟؟ حبت تسإل عليا ؟؟ هزيت التلفون .. سمعتها تتنفس .. قلبي حسيتو باش يخرج من بلاصتو .. شديت روحي .. ونزلتي على ساقي بيديا وغمضت عينيا وقلت .. ألو .......... !! سمعتها تتنفس .. إي والله هيا، باهيشي توا ما نعرش نفسها ياخي آنا !! قعدت ساكتا 3 ولا 4 ثواني بالحساب، حسيت الدنيا وقفت وطوالت وتخيلت 1000 حاجة وحاجة، زعمة باش تقلي كلام يرتحني ولا يقتلني؟؟ باش تقلي توحشتك ولا كرهتك؟؟ تعبت وانا نستنا معادش النجم الدنيا ضياقت بيا وقلبي عصر عليا .. عاودت قلت ألو ... !! قتلي ألو.. ضو في بدني ضرب، قلبي دق كينو كان واقف عندو سنين، صوتها محلاه، بنين في وذني، صوتها شعل فيا نار، لهبني من داخل، عاود فيق فيل حكايات قديمة .. وفي داخلي 1000 صوت قاعد يعيط ويقوللها: "آمان تكلم قول أي حاجة، طفيلي ناري، بردلي على قلبي، قلي توحشتك حتى بالكذب ميسالش والله نجيك نجري لوكان في آخر الدنيا، بركا باش نشوفك كهو ونروح .. توحشت ريحتك، وبدنك وتعنيقتك، توحشت غزرتك، وتبسيمتك، تصدق توحشت غشك، ميسالك ما تمشيش وتغشش عليا قد متحب لموفيد ما تخلينيش واقعد بجنبي ... شباها ساكتة !! زعمة كهو باش تبعد؟؟ باش تخليني و باش تمشي لغيري؟؟ باش تحب عبد آخر؟؟ إلي يوجع موش إنها باش تبعد.. إلي يوجع ويقتل إنها باش تقلو نفس الكلام إلي كان تقولهولي لغيري !! باش تكلمو و تسإل عليه، باش تكلمو وتسمع صوتو في كل صباح وقبل ما يرقد، باش تولي تضحكلو وتشكيلو وتبكيلو، تحكيلو عاللبسة لتحبها، على الغناية لتذتكرو باها، وعلى صاحبتها لي غارت منها، باش تاقف قدام لمرايا سوايع على خاطرو وتتزين وتمكيج وتلبس وهذا الكل باش تراه، باش تولي تشاورو هوا قبل ما تخرج موش آنا، تتفجع عليه هوا كي يبطا موش آنا، تفرحو هوا موش آنا. زعمة باش تقلو نحبك ؟؟؟ ولا قالتها ؟؟ وكي نراها معاه في الشارع شنعمل نسلم ولا نتعدا كينو لاكان ولا صار ؟؟ كان نلقا نفكها من إيديه ونقلها توحشتك ونعنقها ومعادش نسيبها ؟؟

يعني معادش متاعي ؟؟ معادش نغير عليك ؟؟ ماعادش نخاف عليك ؟؟ ماعادش نسإل عليك ؟؟

علاه هكا .. نحس حاجة لداخل توجع .. حاجة تنزل على قلبي.. زعمة موجوعة كيفي ولا تخمم فيه وصايا نساتني وتعداتني ؟ لغنايات لكل يذكروني باها، لقهاوي و الشوارع، تي حتى بيتي، وجهي في المراية يذكرني بيها؟؟ لبنات لكل فالشارع وليت نغزرلهم هيا، الشعر الكل نحسو تقال على خاطرها .. منجمش ... منجمش ... منجمش نعيش بلاش بيها .. لا هيا متاعي آنا كهو .. ما ياخذها حد مني !! موش قتلي قبل راني ليك... أمان متخلينيش وحدي !!

منيش خايب راني .. والله ماني خايب باش يصير فيا هذا الكل !! كيفاش باش نقوم الصباح ومغير متكون أول حاجة في بالي ؟؟ لشكون باش نجري نفرحو معايا ؟؟ لشكون باش نجري نفرغلو قلبي ؟؟ لشكون باش نمشيلو ونرتاحلو ونحكيلو نهاري ؟؟ آآآآه باش تهزو للبلايص إلي مشينالهم ؟؟ باش تحكيلو حكاياتنا ؟؟ آمان جاوب قول حاجة *** التلفون رزن من يدي .. نتما نسمع كلمة .. مانيش عارف يا موجوعة .. يا سارحة .. يا تبكي .. يا تخمم ؟؟ ستخايلتها قدامي .. كان نراها .. نسامحها، إي والله نسماحها، لفايدة هاي بجمبي، ميسالش تو الوقت يصلح، محسوب هكا ولا هكا موجوع آنا، آما موجوع وهيا بجنبي خير ..

زعمة نتكلم ونقلها توحشتك، تمشيش تتغشش عليا، تمشيش تعلق .. لا لا زعما تقلي حتانا توحشتك .. "كي خممت فيها لكلمة بركا فرحت" !!

ميسالش نعرفها تحبني متخلينيش ونقوللها راني توحشتك ومسامحك، غير أرجع بركا، وكان تحب تو نجيك توة ... ثنية داركم حافضها أكثر من دارنا.. ياما مشينا فبها ولعبنا وفدلكنا فيها.. تتذكر وقتلي إنتي تجري وانا خالط عليك وشديتك وعنقتني وقتلي نحبك ؟؟؟ كان تحب نجيك ونهزك للقهوة إلي تحبها ونخلص آنا كان لزم لفايدة تكون فرحانا... ونرا الضحكة في وجهك.. كان تحب ماتتكلمش، نراك كهو .. تعوضلي على كل دمعة هبطت .. !!

كهو باش نقوللها هذا الكل وقلبي قايلي خير وقلبي عمرو ما خلاها بيا ..

قلتلها إسمع راني توحشتك وماذبيا لوكان نراك و ...

"علقت التلفون ..."

قعدت شاد التلفون درج في وذني .. بدني وحل.. مقعد كان لهوا داخل خارج.. عرقت بكلي.. بدني سخن.. موخي تحرق.. قلبي ذاب ..!! وتعلقت معاها حياتي.

قلبي يوجع فيا والدمعة هبطت من عينيا والدنيا دارت بيا وعمري ماني باش ننسا هالبنية.

 "هذه القصة من محض خيالي
"نذير".

التونسي وعلاقتو بالماسونية ...

بما إنو الشعب التونسي نهار كامل راڤد وليل كامل ساهر كالخفافش، لازم تجيه كالنزعة متع "اليوتوب"، ويبدا يتفرج في حكايات 
مالحيط والڤلڤ يهز فيه ويصبط.

لا علينا.. الحاصل كيما التوانسة الكل لازم يسمعو بالماسونية ومشتقاتها ..

إذا التونسي في وقتها أول حاجة يعملها يمشي يجري كالمدك للڤوڤل ولا يوتوب ويكتب "الماسونية".

بما إنو مدك هوا في راسو .. إذا باش يبدا يصدق أي حاجة يراها وبعد 4 فديوات تفرج فاهم و 3 مقالات قراهم و هوما كاتبهم واحد سكران،
باش يبدا يحس روحو العالم والمثقف وكاشف أسرار الكون.

لحاصل باش يحس روحو عم الطيب ملخر،
ومن غدوا باش يلعبهم دور المحلل والفيلسوف والمثقف والمؤرخ ويولي أي عين وأي مثلث "ديراكت = ماسونية"

وخلي عاد كان في كليب ولا فيلم واحد حك عينو ولا دخلتلو تفشة تي ماو مسكين حياتو تدمرت و ولا ماسوني وحلبلو وهذا باش يحكم العالم وكاللوغة لمڤملة.
وأي فنان حلت معاه وولا مشهور، طول مغير نيقاش "الماسونية عاونوه"

يا بوڤلب شي هالبهامة في هالشعب وهوما يڤودو فاهم كالبڤر إلي يراووه يصدقوه طول. 
ماعندهم عقل يخمو بيه الزح ؟؟

توا بجاه ربي واحد تلقاه مازال ياخو في مصروفو مالدار وعامل تصويرة زعمة زعمة "ماسوني".. لا والغريبة الناس لكل تصدقو.

باللهي شينبو بيه هذا، زعمة باش يعاونهم على إحتلال العالم.

ناس تعدي حياتها كامل تفركس وتقرا والتونسي يخسر سويعة إنترنات ويولي "كونان" موش لعب.

باللهي سؤال للتوانسة كي هيا منظمة سرية كيفاش عرفتوها ؟؟

شبي ولاد توا ديما فادين و ڤالڤين ؟؟؟

باللهي شنوة كان باش ينقص كان جات الدنيا مافيهاش فدة وڤلڤ وروتين ؟ يقولو ناس قبل نحنا ماكانش عنا الشي هذا، والفدة ما كناش نسمعو باها، وكنا ديما عاملين جو وفي قرايتنا ناجحين "آكا لوغة القراية تحت الشمعة ولي هوما ديما لونانين ويمشيو 34678 كيلوماتر في الشتاء.. مفهمتشكيفاش المذبة هاذي إنتشرت عند لوالدين الكل بالرغم يسهرو عالتلفزة وثوالراديو ويقراو على شمعة على أساس الراديو يمشي بال wifi وقتها ... " هوما ماكانش عندهم بروفات مرضة كيما توة لدرجة لبروف كان يلقا يڤتلك، ماكانش عندهم تلفون يطيحلك شارج ولا يوفاولك لفلوس ف شطر النهار، ماعندهمش lavasa ب 3000 إلي تختار يا تفطر ولا تشرب قهوم مع صحابك، ما عندهمش مشاكل قراية وشارع وزيد 4000 عبد في الإنترنات تعاني فاهم وفي ماشاكلهم، وبخلاف 24566 إسم غناية إلي حافضهم و 35 serie تبع فاها "ماو كل وقت وقتو هوما كان عندهم عبد العزيز العروي حلقة 456 توا game of thrones جزء 4 إلي هبطت لبارح على فكرة"

لحاصل .. قبل مشكلة تقعد عام باش توصل من بلاصة لبلاصة، توا تحل لنترنات لحضة بركة تسمع 10 ماتو و 30 في الحبس وبخلاف إلي حرق روحو وإلي إنتحر، وبعد يقولو شبي شعب فادد. وبخلاف هذا ما عندهمش جبورا كيما توا إلي هلكو وجه لبلاد وكرهونا فاها.

ما عندهمش تخمام في مستقبل كيما توة، قبل تقرا شوية وتشوف خدمة وتعيش جوك حفلات، توا تعدي شطر عمرك تقرا باش بعد تشد الدار و تتفرج فالشهادة هذا كان خلاوك ولاد لحلال.

الدنيا عاكستنا وعاطيتنا بالظهر، من بعد لعباد 7 متع الصباح تلقا وجوههم مقلوبة، متغشين من أول ميحلو عيناهم، تقول تولدو يتشوحرو ،،

ماهيش مشكلت ولاد توا آما مشكلت وقت توة.

يحبونا نعيشو بستراس والتخملم هذا الكل وبعد يقولونا كيفاه إنتوما هكا !!

حاول جيب واحد من ناس قبل قلو يقرا قراية توا ويخمم في مستقبلو كيما ولاد توا وبالغلا هذا وكيفاش باش يقصم مصروفو وكيفاش باش يتفرهد ويقرا ويرقد ويخمم في العالم لاخر الإفتراضي إلي عايش فيه ويسهر ويعيش شبابو ويخدم .. وهاذم لكل في 24 ساعة أكهر .. والله ما ينتحر !!

تي بلاهي تعطاهم تلفون بركا وحاول توراهم كيفاش يكتبو msg صدقني ما يقعد يحارب ساعة كاملة وبعد يقلك كملت وكي تجي تشوف تلقا التلفون مسكر أصلا ..

والله مساكن نحنا !!!

ملحد ... !!

تعريف الملحد بصورة عامة : هو إنسان ما يمن بحتى شي ... هذا إلي متفاهم عليه العالم الكل.

آما تعريف الملحد بالنسبة للتونسي : هو أي واحد يكون درا كيفاه .. بصورة أوضح وزعمة زعمة فلسفة "أي واحد مختلف عالمجموعة" !!

يعني كي يبدا لواحد مطول شعرو، و يلبس درا كيفاه، ولّا يسمع موزيكة جديدة، "كيما نقولو عامل لوك لروحو" التوانسة يغزرولو على أساس ملحد !!

والطفلة كي تبدا ماهيش كالبنات الكل تولي باها وعلاها وهذا الكل ألخاطر حبت تمون مختلفة.

يعني باش تولي مسلم ويغزروك وليّد باهي وعاقل ومحلاك لازمك تكون كيفهم .. و Copier/coller في كل شي !!

في هالبلاد كي تبدا "مختلف" وتختار كيفاش تعيش حياتك وتلبس كيما إنتِ تحب وكيما مخك يقلك، وموش على خاتر فولان ولا فلتان لبس هكاكا، وكي تسمع موزيكا على خاطر تحس باها وتعمرلك راسك، وما تبعش ريق اللموذة والبيعات لمقطعة... يوليو يغزرولك غزرة أخرى !!! كيفاش .. يجي منو متكونش كيفهم توا هذا كلام!!

آما كي تبدا كيفهم عايشين كالبڤر لكلها اتبع في بعاضها لدرجة فالشارع من كثرة ماهم لابسين كيف كيف، ويحكيو كيف كيف تدخل بعضك، تحس كينو لعبد شفتو 10 مرات في نهار واحد. تي بلاد كاملة نفس المشطة يا زاحي قال شنوة لموظة، ياخي ماعندهمش عقل يختارو بيه !!

لحاصل كيما قلنا كي تبدا كيفم وتبدا ... (تسكر، وتكفر، وتسرق، وتتعدا عالناس، وتتمنيك على كل طفلة تتعدى، وراسك فارغ لا ثقافة لا علم، وبرشا حاجات أخر)، وقتها ميسالس وعادي ويغزرولك بعين كبيرة "و تقعد مسلم في نظرهم."

آما إنك تكون فقط "مختلف" طول يطعنوك فالدين متاعك ويبداو يحكيو في ضهرك ويبدو يزيدو من عندهم .. وهذا الكل على خاطر ما كش كيفهم. تقول علاهم غايرين كيفاش مكش هايم معاهم كالبڤر لكلها اتبع في بعضها.

وياخي من وقتاش الدين لبسة، ولا كل واحد يكفر إلي حب ألخاطر راه عامل حاجة ما عجبتوش ؟؟ والمشكل لا يسؤلوك لا يكلمون ولا حتى يعرفوك، طول يصرفڤوك بكعبة "ملحد" في وجهك.

ومشكلة أخرى زادة توّا أي واحد حاول يفركس في المواضيع الدينية ولّا يسإل طرف أسألة .. طول هذاكا يتحسب ملحد ومغير نقاش زادة. باش تكون باهي لازم تكون حجرة لتخمم ولا تفكر إلي يقولوهولك تسمع وتهبط راسك وتقول حاظر .. شخلاهم شطرهم لاهم عارفين لا راسهم لا ساسهم حتى دينهم موش عارفينو.. ولغريبة كي تسمعهم يحكيو ما تلقا كان لكلام الزايد والكفر والتقطيع والترييش أكثر مالبنات، آما على خاطرو موش مطول شعرو وموش عامل piercing ميسالش يقعد مسلم وميحسبولوش وميقيدولوش.

يعني باختصار تعريف التونسي للإلحاد هو إنك تكون "مختلف" والإسلام هوا يكون شعرك قصير ومحجم لحيتك ولابس مريول روز مصور فيه فيل ولا ڤرد "وذلك حسب إقتراحات اللموضة" وبطباعة لازم تونس كاملة لابسة كيفو وأي حاجة جديدة اتبعها وأي غناية تسمعها تونس كاملة لازمك بالصيف عليك تكون تسمعها زادة و معجب باهة.

وبالاهي مجرد سؤال شكون إلي تلقاهم تقريبا يحبو يكونو متثقفين ولا يقراو ولا يعيش الفن وزاهيين عاملين جو ولا يقراو حتى كتاب ف حياتهم ؟؟ ظاهرلي مازالت ماخرجتش لموظة لواحد يقرى كتاب .. وقتها تونس كاملة تولي متثقة.

لحاصل شعب مازال متخلف وماشي ويوخر بالمفهوم الباهي والخايب !!!

كلهم كيف كيف ... !! PART 2

... بعد ماكنت تبدا صباحك على صوتها، وتفيقك وتسإل عليك ...

ليوم تحس الدنيا ساكتة، كبيرة وتخوف، وانتي وحدك 

ستانست صوتها يعنقك ويقلك متخافش آني معاك، "تي راك ولدي" 

 .. لفرش ماخلانيش نقوم، خانقني، شاددني 

تقويت على روحي وقمت، 

ريڤلت روحي وقلت موش مشكل تو نعاود نسطر حياتي من أول وجديد .. 

لا لا هاذي كذبة .. آكا لوغت قوي ومنحسش وميطيحني شي .. تي ماو كيما قلنا كلو ماكا طرف اللحم إلي سماووه "ڤلب" ملبرا نضحك زاهي ... عسلامة سي فلان، صباح الخير سي فلتان آما الصوت إلي مستانس يقلي صباح الخير مسمعتوش والضحك إلي نبدا باها نهاري ماريتهاش

 حاسس حاجة ناقصة، حياتي ناقصة .. آنا وليت ناقص

وانا هكاكة هايم حاط غناء ... منعرش علاش حاسس لغناء لكلو يغني علي .. إي والله كيما نحكيلك .. حتى لغناء إلي كنت نضحك عالعباد كي يسمعوه ولا حاسس بيا ... إيييييييه عالدنيا وطيحاتها شبي الدنيا هكا، بالرغم لعباد هاذم الكل، باقي حاسس روحي وحدي مستحق يد تقومني وتعاوني.. قلت مافاها باس تو نكلم صحابي وبڤلا لاها "إلي فات مات" لمشكلة ماهيش فالعباد.. يبداوش دايرين بيك عباد الدنيا الكل ميعوضلكش لعبد إل فس مخك !! ضحكو ولا صوتو ولا حتى تفدليكةو لباسلة ... إي نعم باسلة أما نحبهاو موش مشكل في حالتي هاذي تولي تضحك وباهية وفاها لعسل !! توا لواحد باش يقعد عايش هكا، لاهو عارف كيفاش يبداها الدنيا لمن راسها لا من ساسها لمشكلة عارف إلي قاعد يصير آما ميحس بالجمرة كان إلي يعفص علاها لشكون باش نحكي توا ؟؟ لشكون باش نشكي ؟؟ شكون إلي باش يقلي ماكش وحدك هاني معاك ؟؟ مبقا حد .. لكل مشاو وبقات كانت السماء .. وطرف لهواء .. هاو عاهدك بيه وفا ... فالشارع لوجوه لكل وجوهها .. روايح لكل روايحها .. حتى خيالي كي خيالها !! هاو نوقز التلفون ... ڤلبي دق، نڤز، بدني رعش، دخلت بعضي، إسمها فالتلفون.. زعم إتذكرتني ؟؟ توحشتني ؟؟ حبت تسإل عليا ؟؟ هزيت التلفون .. سمعتها تتنفس .. قلبي حسيتو باش يخرج من بلاصتو .. شديت روحي .. ونزلتي على ساقي بيديا وغمضت عينيا وقلت .. !! .........ألو...........ألو

كلهم كيف كيف ... !!

لحكاية بدات وقتلي بضحكتها جات بديناها بتفدليكا غزرتلي .. غزرتلها .. يدها مستني !! ضحكت، حشمت، دخلت بعضي، باردة وسخونة فرد وقت عرفت نهارتها إلي ماهيش كيما الناس الكل "ولا زعمة كلهم كيف كيف مفماش هاذي ماهيش كيما الناس الكل !؟؟!" حاسيلو عجبتني وعجبتها .. من بدني قرّبتها، واحسن كلام سمعتها ذابت بين إيديا وانا ذبت

نرمال قلت، راهي احسن ما تخطار وديما تذكر راهي مهيش كيف الناس لكل على حلامي حكيتلها والماضي والحاضر قلتلها وديما في بالي إلي ماهيش كيف الناس الكل بلّي ريت وسمعت، وبرشا عباد ودعت، وقلت توا يتعوض بعد غرقنا في الدنيا.. بالباهي والخايب خرجنا ودخلنا .. تمرمدنا وضحكنا .. واول خرجة كانت تحت الشتاء .. "كينها البارح" ضحكتها كانت صافية كالطفل الصغير إلي لقا حاجة كان يفركس علاها عندو برشا غزرتلها في عيناها وعنقتها حسيت الدنيا ملكي ... إي والله ملكي ومانيش نكذب .. مادام لقيت العبد إلي موش كالناس لكل ...

من نهار لنهار .. ومن عركة لعركة .. قربنا وبعدنا .. طحنا وقمنا .. آما مازال شاددنا شي لبعضنا وديما نقول مهما يصير نقول راك لقيت العبد إلي ترتاحلو، وتطمانلو، وإلي موش كيما الناس لكل لا يكذب لا يخبي، ورقة بيضة صافية بيديك تكتبها...

فما نهار كلي تحس حاجة وماكش عارف شنوا تصدق عينين العبد إلي قدامك ولا قلبك إلي عمرو ماخانك باهيشي !!! كيفاش تصدق كمشة لحم سماوها قلب وتخلي ڤلب الأم "ماو ديما تقلي نحبك كيما أم تحب ولدها .. وساعات تعيطلي يا ولدي" لحاصل في الشك مت، معادش راقد لا ليل ولا عايش صباح نغزرلها في عيناها ونشدها من يدها ونقلها ما تعمل شي يبعدك، راني نموت بعدك، وآمان كون عند وعدك تعنقني وتبدا باش تتكلم .. لكن تعنيقتها تسكرلي عينيا و وذنيا .. وتسرح بيا الدنيا ولاعاد نفهم راسي من ساقيا...

نهار فايق زاهي .. قلبي مقبوظ .. آما ستانست وقلت قداش باش تهلوس، يزي وفيق، ويزيك مالتصديق، راهو ماهو إلا ڤلب كمشة لحم ...

جاني خبر .. قلبلي حياتي كلمتني .. فرحتني بصوتها.. آما ذبحتني بكلامها طلعت كيفهم لكل ... عملت عمايل كالسم ذبحتني وخلاتني ... تفرجت فيا وبكاتني الدنيا بردت.. للوان تبدلت.. السماء ماعادش كيما قبل زعمة وفا، إلي نخسايلها موش كالناس لكل.. طلعت "....." كيفهم !! كيفاش كانت تعنقني وهيا كاذبة عليا.. ولاعبة بيا ؟؟ كيفاه كانت تقلي إلي آنا الكل .. وضحكت عليا صحابها الكل؟؟؟ كيفاش نقوللها كلام إلي ماقلتو لحد قبلها.. وهيا باقي كاذبة عليا ؟؟ كيفاه .. وكيفاه ؟؟؟ علاه .. ماكنت منقّصها شي .. نقتل روحي باش نعطاها كل شي نضحك كي تضحك .. نحزن كي تحرن !! شبي الدنيا هكا ؟؟ ولا لا .. هيا إلي شباها هكا !!

كيفاش كلمتو .. وسمعتو.. وقربتلو وحستو ولا ضحكتلو كيما أول ضحكة ضحكتهالي ؟؟؟ شباش نصدق وشباش نخلي .. تي شكيت حتى في "أستغفر الله العظيم" !!!

مازالو آيامات، آما نعرف إل حكايتنا وفات .. وفات .. كذبة وتعدات .. حكاية وتنسات .. !!!نعرف توجع آما ضمير مرتاح .. نضحك وحمدالله .. ديما راسي عالي .. آما آنا إلي مانيش كالناس الكل ... وهيا إلي كالبقية الكل !!!